Faint fyddwch yn ei gyfrannu?
| Os yw eich tâl pensiynadwy gwirioneddol: | Y gyfradd gyfrannu a delir gennych: |
|---|---|
| Hyd at £18,400 | 5.5% |
| £18,401 i £29,000 | 5.8% |
| £29,001 i £47,300 | 6.5% |
| £47,301 i £59,800 | 6.8% |
| £59,801 i £84,000 | 8.5% |
| £84,001 i £119,100 | 9.9% |
| £119,101 i £140,400 | 10.5% |
| £140,401 i £210,700 | 11.4% |
| £210,701 neu fwy | 12.5% |
A yw fy nghyflogwr hefyd yn cyfrannu?
Ydi.
Yn ogystal â'ch cyfraniadau chi, mae eich cyflogwr yn talu cyfraniadau at gost darparu buddion y CPLlL. Gallwch weld swm cyfraniad eich cyflogwr ar eich slip cyflog misol.
Caiff y gyfradd hon ei hadolygu bob tair blynedd gan Actiwari'r Cynllun.
Sut mae rhyddhad treth yn gweithio?
Caiff eich cyfraniadau CPLlL eu tynnu o'ch cyflog cyn cyfrifo treth incwm. Mae hyn yn golygu bod y rhan fwyaf o aelodau sy'n talu treth yn elwa o ryddhad treth ar eu cyfraniadau pensiwn.
Mewn geiriau syml, mae cyfrannu at eich pensiwn yn costio llai i chi nag y mae'n ymddangos oherwydd bod eich bil treth yn cael ei leihau.
Er enghraifft:
- Os ydych yn drethdalwr cyfradd sylfaenol, am bob £100 a delir i'r CPLlL, byddwch yn arbed £20 mewn treth.
- Os ydych yn drethdalwr cyfradd uwch, am bob £100 a delir i'r CPLlL, byddwch yn arbed £40 mewn treth.
Taliad Pensiwn i Enillwyr Isel
Mae CThEF yn cysylltu ag aelodau cymwys o'r CPLlL ynghylch Taliad Pensiwn i Enillwyr Isel. Mae'r taliad hwn wedi'i gynllunio i helpu pobl ar incwm isel a gollodd ryddhad treth ar gyfraniadau pensiwn.
Efallai y byddwch yn gymwys os ydych:
- wedi talu cyfraniadau i'r CPLlL o flwyddyn dreth 2024/25 ymlaen, ac
- heb gael rhyddhad treth ar eich cyfraniadau pensiwn oherwydd nad oeddech yn talu Treth Incwm.
Nid oes angen gwneud cais. Bydd CThEF yn adnabod aelodau cymwys ac yn cysylltu â nhw'n uniongyrchol.
Sut bydd CThEF yn cysylltu â mi?
Bydd CThEF yn cysylltu ag aelodau cymwys naill ai drwy lythyr neu drwy eu Cyfrif Treth Personol.
Pam mae'r taliad hwn yn cael ei wneud?
Mae'r taliad wedi'i gynllunio i helpu pobl ar incwm isel nad oeddent yn elwa o ryddhad treth ar gyfraniadau pensiwn oherwydd bod y CPLlL yn defnyddio trefniant tâl net.