Yr Hanfodion
✓ Nid cronfa fuddsoddi na phot pensiwn yw'r CPLlL
✓ Swm newydd yn cael ei ychwanegu yn seiliedig ar eich cyflog pensiynadwy
✓ Pensiwn yn cynyddu bob blwyddyn i helpu i amddiffyn rhag chwyddiant
✓ Buddion cyn 1 Ebrill 2014 yn cael eu cyfrifo'n wahanol
Sut mae eich pensiwn yn gweithio?
Ers 1 Ebrill 2014, mae'r CPLlL yn gynllun Cyfartaledd Gyrfa wedi'i Ailbrisio (CARE).
Bob blwyddyn rydych yn cronni pensiwn newydd yn seiliedig ar eich cyflog pensiynadwy yn ystod y flwyddyn honno.
Caiff y pensiwn a gronnwyd ei ychwanegu at eich cyfrif pensiwn ac yna ei ailbrisio bob blwyddyn yn unol â mynegai a bennir gan y Llywodraeth er mwyn helpu i ddiogelu ei werth rhag effaith chwyddiant.
Enghraifft o sut mae pensiwn CARE yn cronni
Yn y CPLlL, rydych yn cronni 1/49 o'ch cyflog pensiynadwy bob blwyddyn. Er enghraifft, os yw eich cyflog pensiynadwy yn £24,500, byddwch yn cronni £500 o bensiwn blynyddol (£24,500 ÷ 49).
Mae'r tabl isod yn dangos sut mae pensiwn CARE yn cronni dros dair blynedd a sut mae ailbrisio yn cynyddu'r pensiwn sydd eisoes wedi'i gronni.
| Blwyddyn | Cyflog pensiynadwy | Cyfrifiad CARE | Pensiwn a gronnwyd | Ailbrisio | Cyfanswm y cyfrif pensiwn |
|---|---|---|---|---|---|
| 2014/15 | £24,500 | £24,500 ÷ 49 | £500.00 y flwyddyn | +1.2% | £506.00 y flwyddyn |
| 2015/16 | £24,745 | £24,745 ÷ 49 | £505.00 y flwyddyn | -0.1% | £1,009.99 y flwyddyn |
| 2016/17 | £24,992.45 | £24,992.45 ÷ 49 | £510.05 y flwyddyn | +1.0% | £1,535.24 y flwyddyn |
Ar ddiwedd y drydedd flwyddyn, mae'r aelod wedi cronni £1,535.24 y flwyddyn. Nid lwmp swm nac "pot" pensiwn yw hwn. Mae'n bensiwn blynyddol a delir am oes pan fyddwch yn ymddeol.
Beth os oeddwn yn aelod cyn 1 Ebrill 2014?
Cyn 1 Ebrill 2014, roedd y CPLlL yn gynllun cyflog terfynol.
- Ar gyfer gwasanaeth a gronnwyd rhwng 1 Ebrill 2008 a 31 Mawrth 2014, roedd pob blwyddyn o aelodaeth yn cronni pensiwn o 1/60 o'ch cyflog terfynol.
- Ar gyfer gwasanaeth a gronnwyd cyn 1 Ebrill 2008, roedd pob blwyddyn o aelodaeth yn cronni pensiwn o 1/80 o'ch cyflog terfynol ynghyd â lwmp swm awtomatig o dair gwaith eich pensiwn.
Os oeddech yn gweithio'n rhan-amser, byddai'r gwasanaeth a gronnwyd yn cael ei addasu yn unol â'ch oriau gwaith.
Bydd unrhyw fuddion cyflog terfynol a gronnwyd gennych cyn 1 Ebrill 2014 yn cael eu cadw a'u talu ochr yn ochr â'ch buddion CARE.
Enghraifft o sut mae buddion cyflog terfynol yn cael eu cyfrifo
Yn yr enghraifft hon:
- Cyflog terfynol pensiynadwy: £30,000
- 8 mlynedd o aelodaeth cyn 1 Ebrill 2008
- 6 blynedd o aelodaeth rhwng 1 Ebrill 2008 a 31 Mawrth 2014
8 ÷ 80 × £30,000
= £3,000 o bensiwn y flwyddyn
3 × £3,000
= £9,000 o lwmp swm
6 ÷ 60 × £30,000
= £3,000 o bensiwn y flwyddyn
Pensiwn blynyddol: £6,000 y flwyddyn
Lwmp swm awtomatig: £9,000
Byddai'r buddion hyn yn cael eu talu ochr yn ochr ag unrhyw fuddion CARE a gronnwyd ar ôl 1 Ebrill 2014.
Pynciau Cysylltiedig
Rhwymedi McCloud