Mae Cronfa Bensiwn Gwynedd yn cymryd ei chyfrifoldebau fel cyfranddaliwr o ddifri. Mae’n ceisio cadw at y Cod Stiwardiaeth ac yn annog ei rheolwyr buddsoddi apwyntiedig i’w gwneud hefyd. Gweler stiwardiaeth fel rhan o’r cyfrifoldebau perchnogaeth rhandaliadau ac felly rhan gyfannol o’r strategaeth buddsoddi.
Yn ymarferol mae’n bolisi'r gronfa i weithredu’r Cod trwy’r trefniadau gyda’i rheolwyr buddsoddi a thrwy aelodaeth o’r Local Authority Pension Fund Forum.
Egwyddorion y Cod Stiwardiaeth
Egwyddor 1 - Dylai buddsoddwyr sefydliadol ddatgan yn gyhoeddus eu polisi ar sut y byddant yn cyflawni eu cyfrifoldebau stiwardiaeth.
Mae Cronfa Bensiwn Gwynedd yn cymryd ei chyfrifoldebau fel cyfranddaliwr o ddifri. Mae’n ceisio cadw at y Cod Stiwardiaeth ac yn annog ei rheolwyr buddsoddi apwyntiedig i’w wneud hefyd. Gwelir stiwardiaeth fel rhan o’r cyfrifoldebau perchnogaeth rhandaliadau ac felly’n rhan annatod o’r strategaeth fuddsoddi.
Yn ymarferol mae’n bolisi'r Gronfa i weithredu’r Cod drwy’r trefniadau gyda’i rheolwyr buddsoddi a thrwy aelodaeth o’r Local Authority Pension Fund Forum.
Egwyddor 2 - Dylai buddsoddwyr sefydliadol feddu ar bolisi cadarn ar gyfer rheoli gwrthdaro buddiannau mewn perthynas â stiwardiaeth.
Mae’r Gronfa yn annog ei rheolwyr buddsoddi i feddu ar bolisïau sy’n cyfarch gwrthdaro buddiannau posibl. Trafodir y rhain cyn penodi rheolwr ac fe'u hadolygir fel rhan o’r broses safonol monitro rheolwyr.
Mewn perthynas â gwrthdaro buddiannau o fewn y Gronfa, mae aelodau’r Pwyllgor Pensiynau yn gorfod datgan buddiannau cyn cyfarfodydd y Pwyllgor.
Egwyddor 3 - Dylai buddsoddwyr sefydliadol fonitro eu cwmnïau buddsoddi.
Datganolir cyfrifoldeb rheoli buddsoddiadau’r Gronfa o ddydd i ddydd i’r rheolwyr buddsoddi apwyntiedig ac mae’r Gronfa yn disgwyl iddynt fonitro cwmnïau, ymyrryd pan fo’n briodol, ac adrodd yn ôl yn gyson ar eu gweithgareddau.
Derbynnir adroddiadau ar bleidleisio ac ymgysylltu yn chwarterol.
Yn ogystal, mae’r Gronfa yn derbyn rhybuddion gan y Local Authority Pension Fund Forum sy’n amlygu materion llywodraethu corfforaethol pryderus ac sy’n cael eu hystyried yn briodol.
Egwyddor 4 - Dylai buddsoddwyr sefydliadol sefydlu canllawiau clir ar bryd a sut y byddant yn uwchraddio eu gweithgareddau.
Fel yr amlinellwyd uchod, mae cyfrifoldeb am ryngweithio dydd i ddydd gyda chwmnïau wedi ei ddirprwyo i reolwyr asedau’r Gronfa, gan gynnwys uwchraddio ymgysylltiad lle bo angen.
Disgwylir iddynt ddatgan eu canllawiau yn eu datganiadau cydymffurfiaeth eu hunain gyda’r Cod Stiwardiaeth.
Ar adegau, gall y Gronfa ei hun gymryd rhan mewn uwchraddio materion, yn bennaf drwy weithgareddau ymgysylltu’r Local Authority Pension Fund Forum.
Egwyddor 5 - Dylai buddsoddwyr sefydliadol fod yn barod i weithredu ar y cyd gyda buddsoddwyr eraill pan fo hynny’n briodol.
Mae’r Gronfa yn ceisio cydweithio gyda chyfranddalwyr sefydliadol er mwyn uchafu ei dylanwad ar gwmnïau unigol.
Gwneir hyn drwy aelodaeth o’r Local Authority Pension Fund Forum, sy’n ymgysylltu gyda chwmnïau ar faterion amgylcheddol, cymdeithasol a llywodraethu ar ran ei aelodau.
Egwyddor 6 - Dylai buddsoddwyr sefydliadol feddu ar bolisi clir ar gyfer pleidleisio a datgelu gweithgareddau pleidleisio.
Mewn perthynas â phleidleisio cyfranddalwyr, mae’r Gronfa yn ceisio defnyddio pleidleisiau sy’n gysylltiedig â’i daliadau ecwiti yn y DU ac mewn marchnadoedd tramor lle bo hynny’n ymarferol.
Mae cyfrifoldeb dros ddefnyddio hawliau pleidleisio wedi ei ddatganoli i reolwyr asedau apwyntiedig y Gronfa.
Mae hyn yn cynnwys ystyried esboniadau cwmnïau ynglŷn â chydymffurfiaeth gyda’r Cod Llywodraethu Corfforaethol.
Derbynnir adroddiadau rheolaidd gan reolwyr yr asedau ar y defnydd o bleidleisiau a gellir trafod materion dadleuol mewn cyfarfodydd y Pwyllgor.
Nid yw’r Gronfa yn datgelu data pleidleisio ar hyn o bryd.
Egwyddor 7 - Dylai buddsoddwyr sefydliadol adrodd yn gyson ar eu gweithgareddau stiwardiaeth a phleidleisio.
Mae’r Gronfa yn adrodd yn flynyddol ar weithgareddau stiwardiaeth mewn adran benodol ar "Buddsoddiad Cyfrifol" yn ei Hadroddiad Blynyddol.